Ang Batang Magalang (Pagsusuri)

 

 

A.    Sining ng Pagtula

 

1.     Sukat-  Ang tulang ito ay mayroong sukat na lalabindalawahin o labindalawang pantig sa bawat linya o taludtod.

 

Unang Saknong: 12-12-12-12

Ikalawang Saknong: 12-12-12-12

 

 

2.     Tugma- Maituturing na may tugma ang isang tula kapag magkakapareho ang tunog ng dulo ng dalawa o higit pang taludtod. Hindi lamang titik ang nauulit kundi ang tunog o ang ponema. Sa tulang ito hindi pare-pareho ang tugmang aking natagpuan. Narito ang aking suri:

 

·       Unang Saknong: ang tugmaan naman nito ay maituturing  na tugma sa katinig o tugmaang di-ganap na pumapasok naman sa ikalawang lipon kung saan napabilang ang mga katinig na n-n-l-y  na siyang nasa dulo ng mga taludtod sa unang saknong ng tula.

·       Ikalawang Saknong: ang tugmaan naman nito ay maituturing na tugma sa patinig o tugmaang ganap dahil ito ay nagtatapos sa patinig kahit na ito pa ay may kasamang katinig. Makikita mayroong a-a-n-n na siyang matatagpuan sa dulo ng bawat  taludtod sa ikalawang saknong.

           

3.     Sensura- ito ay ang pansamantala o bahagyang pagtigil sa gitnang bahagi ng taludtod na mayroong labindalawa at labinwalong pantig sa loob ng isang taludtod. Ang tulang ito ay mayroong lalabindalawahing sukat at maaaring nasa ika-anim na pantig matatagpuan ang sensura. Narito ang aking sipi na nilagyan ng sensura.

 

Ang batang magalang,/ kinatutuwaan

Ng kapwa bata at/ maging matanda man.

Pag nasasalubong ang/ guro n’yang mahal,

Ngiti ng pagbati/ ang lagi n’yang bigay.

 

Di nakikipag-away/ sa kapwa bata,

At di gumagamit/ salitang masagwa.

Sa pagsasalita’y/ laging mahinahon,

Ang po at opo ang/ lagi niyang tugon.

 

4.     Saknong- ito ay ang grupo sa loob ng isang tula na binubuo ng dalawa o higit pang linya o taludtod. Ang tulang pambatang ito ay mayroong dalawang saknong na binubuo ng apat na taludtod ang bawat saknong. 

 

5.     Aliw-iw o Indayog- Bahagi na ng tulang pambata ang pagkakaroon ng aliw-iw o indayog lalo pa kung bata ang magbabasa nito. Sa tulong rin ng sensura madaling matutukoy kung saan nagkakaroon ng pagbabago ng tono.

 

6.     Larawang Diwa- ito ang mga salitang binabanggit sa tula na nag-iiwan ng malinaw at tiyak na larawan sa isipan ng mambabasa. Ang buong tula ay nagpapakita ng larawang diwa. Dahil ito ay isang halimbawa ng tulang pambata kailangan ay madaling maunawaan at madaling makita ng mga batang mambabasa at tagapakinig ang inilalarawan o binubuong imahe ng may-akda sa tula.

 

Ang batang magalang, kinatutuwaan

Ng kapwa bata at maging matanda man.

Pag nasasalubong ang guro n’yang mahal,

Ngiti ng pagbati ang lagi n’yang bigay.

 

Di nakikipag-away sa kapwa bata,

At di gumagamit salitang masagwa.

Sa pagsasalita’y laging mahinahon,

Ang po at opo ang lagi niyang tugon.

 

 

7.     Simbolismo- ito ang mga salita sa tula na may kahulugan sa mapanuring isipan ng mambabasa.

 

Magalang- ang pagiging magalang ng isang bata ang kumakatawan sa kabuuan ng tula. Maraming salita o katangian sa tula ang naiugnay sa pagiging magalang ng isang bata.

 

8.     Talinghaga- ito ay sangkap ng tula na may kinalaman sa natatagong kahulugan ng tula o ‘di kaya’y ito ang ‘di tiyakang tumutukoy sa bagay na binabanggit.

 

Walang tayutay o malalim na salita ang matatagpuan sa kabuuan ng tula. Marahil ang tula na ito ay isang halimbawa ng tulang pambata kung kaya’t wala itong malalim na pagpapakahulugan. Pero kung ating iisipin, ang simpleng tulang pambatang ito ay maaari ring mensahe para sa mga nakatatanda na hindi marunong magbigay galang sa higit pang nakakatanda o kahit na sa bata.

 

9.     Persona- ito ang nagsasalita sa loob ng tula o isang teksto. Sa tulang ito ang nakikitang persona ay maaaring isang magulang na nangangaral sa kaniyang anak.

 

B.    Mga Teoryang Pampanitikan

 

1.     Teoryang Humanismo

Ang layunin ng tula ay ipakita na ang kakayahan ng tao, kanyang kaisipan at magandang katangian na tinataglay ng isang tao. Sa tula binanggit ang mga katangian ng isang batang magalang.

 

2.     Teoryang Moralistiko

Ang layunin ng tula ay ilahad ang iba't ibang pamantayang sumusukat sa moralidad ng isang tao - ang pamantayan ng tama at mali. Inilalahad din nito ang mga pilosopiya o proposisyong nagsasaad sa pagkatama o kamalian ng isang kilos o ugali ayon sa pamantayang itinakda ng lipunan. Sa madaling sabi, ang moralidad ay napagkakasunduan ayon na rin sa kaantasan nito. Makikita sa tula ang pagpapakita ng wastong kilos ng isang batang magalang.

 

C.    Kabuuang Sariling Puna

 

      Kahit na ang tula na ito ay isang halimbawa ng tulang pambata, taglay pa rin nito ang ilang katangian ng tradisyunal na tula na mayroong sukat at tugma. Madali at payak ang mga salitang ginamit na siyang angkop sa mga mambabasa o tagapakinig na bata. Hindi tulad ng mga matanda, hindi pa kaya ng mga bata ang mag-analisa ng talinghaga sa tula at tiyak na hindi magagawang makapukaw ng atensyon sa mga bata ang tulang malalim at may mabubulaklak na salita.

      Ang unang saknong ng tula ay patungkol sa mabuting naidudulot ng pagiging magalang sa pamilya at kung ano ang mabuting ugnayan ang nabubuo nito.

      Sa huling saknong naman ay ang relasyon sa kamag-aral, kaibigan at katangiang kanyang dadalhin maging sa pagsasalita.